لاہور: جناح ہاؤس پر حملہ کیس کی تحقیقات کرنے والی تفتیشی ٹیم (جے آئی ٹی) نے چیئرمین پی ٹی آئی سمیت 5 ملزمان کو سمن جاری کرتے ہوئے شام 7 بجے حاضری یقینی بنانے کی ہدایت کردی۔

نو مئی کو جناح ہاؤس پر ہونے والے حملے کی تحقیقات کرنے والی ٹیم نے ملزمان کی طلبی کے سمن جاری کیے، جس میں ایس پی سول لائنز اور ماڈل ٹاؤن کو چیئرمین پی ٹی آئی سمیت پانچ ملزمان کی حاضری یقینی بنانے کی ہدایت کردی۔

جے آئی ٹی نے کہ چیئرمین پی ٹی آئی کے علاوہ بشری بی بی ، حماد اظہر ،حسان خان نیازی اور مراد سعید کو طلب کیا ہے، ملزمان کو 21 جون کو شام 7 بجےڈی آئی جی انویسٹی گیشن آفس میں جے آئی ٹی کے سامنے پیش کیا جائے۔

سمن میں کہا گیا ہے کہ ملزمان تھانہ سرور روڈ میں درج مقدمے کی تفتیش میں پیش ہوں گے، مقدمہ 10 مئی کو قتل، اقدام قتل، توڑ پھوڑ، جلاؤ گھیراؤ اور دہشت گردی کے دفعات کے تحت درج ہوا تھا۔

واضح رہے کہ گزشتہ روز قبل انسداد دہشت گردی کی عدالت نے ایک اور مقدمے میں چیئرمین پی ٹی آئی سمیت چار ملزمان کے ناقابل ضمانت وارنٹ گرفتاری جاری کیے ہیں۔