• ہارون رشید
  • بی بی سی اردو ڈاٹ کام، اسلام آباد

تحریک کے امیر مولانا فضل اللہ اس جنازے میں شریک تھے

،تصویر کا ذریعہTTP

،تصویر کا کیپشن

تحریک کے امیر مولانا فضل اللہ اس جنازے میں شریک تھے

پاکستان میں شدت پسند تنظیم کالعدم تحریک طالبان پاکستان نے اعلان کیا ہے کہ کابل سے تعلق رکھنے والے تحریک کے کمانڈر محمد حسن دو دن قبل قبائلی علاقے شمالی وزیرستان میں بویا کےمقام پر پاکستانی فوج کےساتھ ایک جھڑپ میں ہلاک ہوگئے ہیں۔

تحریک طالبان پاکستان کے مرکزی ترجمان شاہد اللہ شاہد کی جانب سے جاری ایک بیان کے مطابق ’کمانڈر حسن کچھ عرصہ قبل افغانستان کی جیل سےرہائی پا کر دوبارہ اپنے ساتھیوں کے ہمراہ پاکستان میں جہادی سرگرمیوں میں مصروف تھے۔‘

تنظیم کا کہنا تھا کہ بویا میں پاکستانی فوج پر یہ حملہ مقامی طالبان، محسود مجاہدین اور تحریک طالبان کے اشتراک سے کیا گیا تھا، جس میں اس کا دعوی ہے کہ فوج کو بھاری جانی اور مالی نقصان پہنچایا گیا۔ بیان میں کہا گیا ہے کہ ’دس سے زائد مورچے فتح کر کے ان میں موجود سازو سامان کو مالِ غنیمت بنا لیا گیا۔‘

یہ اعلان اس تنقید کی بعد سامنے آیا ہے کہ اب تک کے شمالی وزیرستان حملہ میں کوئی بڑا نام کا شدت پسند نہ تو ہلاک ہوا ہے اور نہ مارا گیا ہے۔

شاہد اللہ شاہد کا کہنا تھا کہ ’پاکستان کی فوج اور حکومت نے غیروں کی ایماء پر شمالی وزیرستان میں جس آپریشن ضرب عضب کا اعلان کیا تھا وہ مکمل طور پر ناکامی کا شکار ہو چکا ہے۔‘

انھوں نے الزام عائد کیا کہ فوج کا تعلقات عامہ کا شعبہ آئی ایس پی آر پاکستانی میڈیا کے ساتھ مل کر متعدد جھوٹے دعووں کے ذریعےپاکستانی عوام کو گمراہ کرنے میں مصروف ہے۔

انھوں نے 900 ملکی و غیر ملکی شدت پسندوں کی ہلاکت اور ان کے کمانڈ اینڈ کنٹرول نظام کی مکمل تباہی، شمالی وزیرستان کے اکثر علاقےکلئیر کرنے، ملالہ حملے کے ذمہ داروں کی گرفتاری، کراچی سمیت مختلف مقامات پر پولیس اور رینجرز کے ساتھ مقابلے میں تحریک طالبان کے ساتھیوں کی ہلاکت کے بیانات کو مسترد کر دیا۔

ان کا کہنا تھا کہ پاکستانی فوج نے اب تک بے دریغ بمباری میں عورتوں اور بچوں سمیت سینکڑوں عام قبائلیوں کو بے دردی سے ہلاک کیا ہے۔

ان کا کہنا تھا کہ ان کی تمام سینٹرل کمانڈز مکمل طور پر محفوظ اور فعال ہے اور وہ پاکستانی فوج کے اہم اہداف کو نہایت کامیابی سے نشانہ بنانے میں مصروف ہیں۔

،تصویر کا ذریعہTTP

،تصویر کا کیپشن

ٹی ٹی پی نے کمانڈر حسن کے جنازے کی تصاویر بھی جاری کی ہیں

انھوں نے چند دن قبل ایک کارروائی میں شوال کے علاقے میں ایک جیٹ طیارے کو اینٹی ائیر کرافٹ میزائل کے ذریعےکامیابی سے نشانہ بنانے کا دعوی کیا۔ ان دعووں کی نہ تو سرکاری اور نہ ہی آذاد ذرائع سے تصدیق ہوئی ہے۔

ملالہ حملےکے ذمہ دار وں کے نام پر جن لوگوں کی گرفتاری ظاہر کی گئی ہے، کالعدم تحریک طالبان کا کہنا تھا کہ وہ ان میں سے کسی کو بھی اپنے رکن کی حیثیت سے نہیں جانتی ہے۔

بیان کے مطابق ’یہ لوگ ان ہزاروں بےگناہ لوگوں میں سے ہوسکتے ہیں جو آپریشن راہ راست کے دوران اور اس کے بعد شدت پسندوں سے معمولی تعلق کے الزام میں گرفتار کیے گئے اور اب تک لاپتہ ہیں۔‘

شاہد اللہ شاہد کا کہنا تھا کہ کراچی اور دیگر مقامات پر پہلے سے گرفتار سینکڑوں افراد کو ٹی ٹی پی کے نام پر جعلی پولیس مقابلوں میں ہلاک کیا جا رہا ہے۔

تحریک نے کمانڈر حسن کے جنازے اور مبینہ طور پر تباہ شدہ طیارے کے پرزوں کی تصاویر بھی جاری کی ہیں۔ تحریک کے امیر مولانا فضل اللہ اس جنازے میں شریک تھے۔

No comment

Leave a Reply

Your email address will not be published. Required fields are marked *