کراچی: پریڈی پولیس نے ٹریفک پولیس اہلکار کو تشدد کا نشانہ بنانے والوں کے خلاف مقدمہ درج کرلیا۔

مدعی مقدمہ ٹریفک سیکشن ایمپریس مارکیٹ کے اہلکار منیر حسین نے پریڈی پولیس کو بیان دیا ہے کہ وہ ٹریفک کی روانی کے حوالے سے ڈیوٹی پر تعینات تھا کہ اس دوران صدر دواخانہ سے پریڈی چوک داؤد پوتا روڈ کی جانب جانے والے موٹر سائیکل سوار کو اے ایس آئی صدیق نے ٹریفک قوانین کی خلاف ورزی پر روکا۔

اس نے اپنا نام مبارک علی بتایا اس کا چالان کیا جس پر وہ مشتعل ہوگیا اور اس دوران اس کے دیگر 2 ساتھی بھی آگئے اور انھوں نے مجھے مغلظات بکیں جس کے بعد لاتوں اور گھونسوں سے مجھے تشدد کا نشانہ بنایا اور سرکاری کام میں مداخلت کی۔

بعدازاں وہ دونوں اشخاص صورت شناس موقع سے فرار ہوگئے ، میرا دعویٰ مبارک علی کا مجھے اپنے دیگر 2 ساتھیوں کے ہمراہ کار سرکار میں مداخلت اور مجھ سے مارپیٹ کرنے کا ہے لہذا قانونی کارروائی عمل میں لائی جائے جس پر پریڈی پولیس نے مقدمہ نمبر 490 سال 2023 بجرم دفعات 353 ،186 ، 504 اور 337 اے کے تحت درج کر کے انویسٹی گیشن پولیس کے حوالے کر دیا۔